ديوان العامية

       شعراء المستقبل ... ثمار الأمل

 

ديوان العامية ... شعراء المستقبل ... ثمار الأمل

 

هنا تكون البداية، عندما نحلم أن نمسك القلم ونبث الذي يدور بخواطرنا،، لا يتعيّن علينا أن نتسلح بالدراسات المرهِقة والمتابعات المخيّبة للوجدان الرقيق الذي يسعَى ناحية فردوس الأدب، بل علينا أن نتمسك بهذه اللحظة الحاسمة التي نخطو فيها أول خطواتنا على مدارج القصيدة،، ما أجملها من لحظات لا ننساها جميعًا، مهما علا بنا المقام ومرت علينا الأعوام،، هنا البداية، والدوام، والإصرار، والحب، من هنا نولد جميعا،،

علي حسَّان عن شعراء الطرق 

 

بالامل نفرش طريقنا

بالامل نمحى الاشواك

والوفا يكون صدقنا

دة الوفا طبع الملاك

اسمعوها منى كلمة

جوا نبض قلوبكم تضوى

دى الامل دى احلى كلمة

لو عطشنا نقولها تروى

ننسى ماضى جرح فات

نلقى فرح بكرة زاد

لو وصفت لحد امتى

مش هيبقى الوصف كافى

بالامل نفرش طريقنا

بالامل نمحى الاشواك

والوفا يكون صديقنا

دة الوفا طبع الملاك

ندا رمضان حامد عن شعراء الطرق

 

إلى الحاضر الحاضر ... مايكل

قالو رسم على الرمل

وجدته ... قصة على الرمل

شعر على الرمل

عالم على الرمل

وهو ... عالم بالرمل

سيد كاسب عن شعراء الطرق

 

أحمد أبوبكر السيد بكر (أحمد أبوبكر السيد)

 

أجمل غرام

 

ياما شفت كتير وياها

ومهما حاولت أنساها

بعيد عنها وروحي معاها

كفاية نيلها ولا مرساها

ياما سهرت كتير في سماها

ويا نجوم تسهر ترعاها

سافرت بعدت وقلبي هناك

حسيـت قالتلي هستناك

ومهما يطول بعدك ده لقاك

في السما مكتوب إسمي وياك

واللقا ديما هيكون موجود

دي السما واسعة وما ليها حدود

وذكرى حلوة في البال بتعود

والليل ديما هيكون مستني

والنجوم هتكون بتغني

خليك يا قلبي كده متهني

مش قادر آجي بس أكيد

هقدر أعدي وأرمي سلام

ده اللي بيني وبينك بيزيد

وأجمـــل مــن أي غــرام

 

 

 

أحمد الحسينى السيد الحسينى (العبد الفقير لله)

 

رباعيات

 

شويه قالوا البلد دى فيها حكومه

قلت اخيرا هتبقى فى ناس مسئوله

هيبقى فى حد مهتم بالشباب

لاقيتهم قالوا هنبدأ بالطفوله

******************

 

فين حقوق الشعب

الناس ماتت من الغلب

لاقيت مسئول قال

هنموت اى كلب

******************

اموت واعرف فين الراجل

اللى هيعمل اعمال

يقضى بيها على الكلام

وعلى اى حقاره افعال

******************

الكبير مش عنده احساس

والناس قالت خلاص مش بيحس

لان قلبه قبل عقله مات

هو كان الكلام على مين فى الاساس

******************

كل اللى فات من ايام

هنطلع منه بحكم وحكام

مشيوا على العدل

ودسوا على الظلم

******************

الشعوب العربيه

بتمثل مسرحيه

عشان تزعل الدنيا

ويتقال دول ميه ميه

******************

محدش عارف الصح والغلط

والتفكير فى كده اكبر غلط

كل ما حد يتكلم

يتقاله انتا غلط

******************

الموضوع نظام

له اسس واحكام

بس محتاج انسان يفكر

مش شويه نعام

******************

انزلوا شوفوا المستشفى

هتلاقوا على الارض مرضى

والاطبه عاملين زى السوسته

وعلى السرير اتفضل الموتى

******************

على الطرق بتزيد. بتكتر الحوادث

وعشان مكنش بكدب دى كوارث

وكله بيقول مفيش زينا

احنا عاملين محطه بحوث

******************

صخره الدويقه وقعت

والبيوت فى العريش غرقت

والمسئولين نزلوا يعينوا

وساعتها الدنيا زاطت

******************

شاب نفسه يتجوز

بس حلمه من ازاز

واهل العروسه

مزودين فى الاستفزاز

 

 

 

إسراء فتحي محمد عمر

 

صعبان عليا

 

صعبـــان عليــا قــــوي .. تعـبـي اللـي راح بـــــلاش

في حيـــاه أنــا اختــرتهـا .. قـال وعـايـزاها تتعــاش

بيها يـــارب اكــرمـنـا .... ومنهـــا مـاتـحرمنــــــاش

بـس الحــال يتعــدل .. وعـــن حــدودنــا مانتعــداش

يـــلا نبــدأ الحكــاية .. بس بقـــــولك ماتنســــــاش

تصلي على الحبيب المصطفى خيـر الانــام والمعاش

مالــــــــــي أنـا! ومــــال احــلام مــاتعيبهــــــــــاش

مــا كنـت بقيت زي البنــات اللي ماتحيــــــــــــــــاش

حياتهم من غير موضه وميـلـودي ماتســـــــــــواش

باتمنى أغير مجتمع ..أفكاره اتحفــرت على "الابلاكاش"

عمليـــــــــــة صعبــة .. بين عقليات الفـــــــــــــلاش

قولت أتعلـم ... ومن غيـر شهادتي ما أعـــــــــــلاش

وبحسرتــــــــي .. لقيته ممــد في الإنعــــــــــــــــاش

يمكن العيب منـــــــي! لأن غيــري ما اشتكـــــــــاش

قولت انمي نفســــــي .. أحسن من مستقبـل طشاش

قالـــي المديـــر "ويلكم" قولتـلــه ماعارفــــــــــــاش

"طيب إيه مدى وعيك".. قولتلــه مــافهمـــــــــــاش

قالـــــــــي لا ... روحـــــــــــــــي مــانستغنـــــــــاش

اقعدي في بيتكم .. وقولي لأبوكي مــايستنــــــــــاش

أي عريس يلــــــــزك .. حتى ولو بطاقيـة وشــــاش

قولت القاعــدة أحسن .. روحـت غسلت الجــــــلاش

يعني في البيت خــايبــة .. والتعليــــــــــم ما خيباش

كلــه محصل بعضه .. اللي عـاش زي اللي ما عاش

حتى المجتمـــع أهملنا .. وأدنــــــــــــا طنـــــــــــاش

واتضح إني بفكــر كتيـر ... وبتفكيـري ماعمـــــلاش

يــاريتني ماتعبـت نفسي .. ونــاس كتيــر مـاتتعداش

خليني! أقعد في مكاني والحق الكـــلام اللي ببــلاش

 

 

 

إسلام حمدي عبد الحميد (طفل وسط الأعاصير)

 

عايز أفرح عايز أغني ... بس ...

 

عايز أفرح عايز أغني                            عايز أعيش في الدنيا زماني

عايز أكل .. عايز أشرب                         عايز أكتر .... أشوف أحلامي

بس يا ناس قولولي ازاي                       أفرح في زمان مش هو زماني

 

إزاي أغني وليا أخويا في                        فلسطين طـــــول عمره يعاني

إزاي أحلم .. إزاي أفكر                          حتى إني أحلم أحـــــــــــــلامي

إزاي أفرح والغـول بيحكم                       بلدي وكل بلاد إخوانــــــــــــي

 

سمو نفسهم أمم متـــحدة                       واتكلموا عني وقطعوا لسانــي

قالوا العالم كله بيحكـم ومفيش                غـــــــــــــول ولا أخويا بيعانـي

قولت يا ناس نفسي أصرخ                     صرخة تقول فين هي أحزانــي

قالوا يا حرام إزاي يتكلــــم                     وهم زمان قطعـولي لســــا ني

 

قلت أنا هكتب ... أنا متعلــم                      عالجهل إتفقوا مع حكـــــامي

كتبت العراق مش فيها سلاح                     قالوا اني سفــاح إرهابـــــي

بُص ليبيا فيــها أنـانـــــــــي                      عايز يشرب من دم اخوانــي

أيوة يا قمة يا عربيـــــــــة                     للعــرب هو إنتي الحامــــــــــي

إدوها مخدر وقالولــــــهـا                      إحنا الغــول واحنا الحامــــــــي

فاقت وقالت يا فلسطـــــين                     قالوا سلام وســـلام بمزاجـــــي

إدوهـا المخدر من تانــــي                      فقالت يا عم .... وأنا مالــــــــي

ده مش مخدر ده مُســــكر                     وقدرت تغـفـل عن أوطانــــــي؟

 

كتبت .. اليمن .. سوريــا                      البحرين .. لبنان .. طب جولاني

إسكـت دي الفرصة الذهبية                   لأجل تزيـد أرض أعدائـــــــــــي

قالــوا هاتـــــوه إعتقلـــوه                     نسوني العلــــــم وكتـابـاتــــــي

 

قلت هشاور لناس تفهمني                     قطعوا ايدي وقالوا حرامــــــــي

بزمتكوا مين اللي حرامـي                     مين اللي سرق أحلامـــــــــــــي

نفسي أموت شهيد أوطاني                    نفسي أموت شهيد أوطانــــــــي

يمكن أعيــش يمكن أغنـي                     أفرح أنا وكــــــــل إخوانــــــــي

 

قولوا عربية ... إسلامية ... أو مسيحية ... أو شيعية أو سنية ,,

هقول انسانية .. دي أرضي .. وده إسلامي

 

 

 

أسماء محى الدين أحمد أحمد (أسيرة الصمت)

 

الله يسامحك يابرغوت

 

كنت نايم انا لا بيه ولا عليه

جا البرغوت وقرصنى وانا لوحديه

كنت باحلم حلم جميل صحانى من عز النوم

كنت باحلم انى امير لوحدى انا ف الكون

نايم ع الحصيره اللى ورثتها عن ابويه وجدى

فرحان بيها وباقول بدى وبدى

كنت فاكر الدنيا وردى

مبسوط بيها وباقول اه ياوعدى

فجأه لقيت برغوت بيقرب منى

روحت اتعدل وامسك حاجه تحوش عنى

مالحقتش اصل البرغوت جا وقرصنى من عز النوم صحانى

خلانى اصرخ بعلو صوتى ميت الف اه يانى

وصحيت انا م النوم وانا بادور ع الاميره

اتارينى لسه ياعينى نايم ع الحصيره

وانا اللى كنت فاكر نفسى نايم على ريش نعام

وبيحلف بحياتى كل الخلق كل الانام

لكن البرغوت حلف عليه لاصحى مانام

وصحيت ولقيت ف وشى كوم من الاحزان

وضهرى انجرح ومن الهدوم بان

وعقلى شت من كترة التفكير والسرحان

ورقبتى اتلوحت من قالب الطوب اللى عامله مخده

وهدومى طلعت منى من كترة الضيق والشده

لكن الله يسامح البرغوت هو اللى صحانى

وورانى الهم بعد ماكان الحلم سهانى

 

 

 

أسماء محمد محمد هاشم (أسماء هاشم)

 

1- الوطن

 

الله اكبر يا وطن

على ارضك رفعنا العلم

على ترابك كتبنا نشيد

وقولنا من تانى هنعيد

مجد غناه الزمن

الله أكبر يا وطن

*******************

مسلم مسيحى أقسموا

هيدافعوا عن أرض الوطن

بالدم والروح والولد

وبكل غالى يملكوا

علشان ترابك يا وطن

**************************

الله أكبر قولناها

وكتير اوى رددناها

لما انتصرنا عالعِدا

فى حروب كتير حاربناها

*****************

الله اكبر كتابناها

وجوا قلوبنا حفرناها

تشهد على فرحة فرحناها

فى حبك يا وطنا الغالى

فى حبك يا بلدنا يا مصر

 

 

2- الجيش المصرى

 

يا أهل بلدى يا اللى عايشين على أرضها

يا اهل بلدى تعالوا اسمعوا حكاية نصرها

حكاية نصر نقشة التاريخ على أرضها

يإيدين جنود حاربوا علشان عزها

ولو حكيت عنهم هقول همَّ سبب مجدها

همَّ السبب فى النصر وقالوا نحن لها

توكلوا عالآله وقالوا بعزم النصر لنا

ماهو خير أجناد الأرض احنا

ودا مش كلامنا دا كلام ربنا

كلام رسول مدح فينا وفى مجدنا

وانجازاتنا أكبر دليل على نصرنا

والحرب عز والسلام شعار لنا

وقت الحروب بنكون قوة موحدة

وفى السلام كل البلاد تسمع لنا

ماهى الحكاية مش حكاية نصرنا

اد ماهى حكاية جيش مصرنا

جيش قوى رفع راسنا كلنا

دافع وحارب فى كل مكان عن عزنا

فى السودان وسوريا وسينا ارضنا

والجولان وطابا كمان رجعتلنا

بإيدين ولادك يابلدنا

والزمان شهد لنا

ان العز والفخر مكتوب على ارضنا

نشكر عليه الله الهنا كلنا

وهب لمصرنا جيش هو سبب فخرنا

 

 

 

إيمان أبوبكر السيد بكر (فراشة الزجل)

 

تايهه

 

مش عارفة !!

أكيد خايفة

أكون تايهه

طريق مرسوم

أكيد بيكون

دليل مضمون

فى ليل وسكون

ليل وضباب

مطر وسحاب

بحور هايجة

أكيد تايهه

ناس بتعيش

وناس بتموت

ماهى فانية

يـــــارب اهدينى

انا ف حيرة

يــــارب اشجينى

بالسيرة

أنا خايفة

أنا تايهة

 

 

 

ايمان شعبان محمود عبد المجيد (امة الله)

 

زمن خاين

 

زمنا دة زمن خاين وتلاقى الخير فية من كتر الشر مش باين

وتلاقى الغدر فى كل مكان والشر فى قلوب البشر مليان

وتلاقى الاخ بيظلم اخوة والابن بيعصى ابوة

والغلبان تلاقية عايش فية شقيان

والظالم تلاقية فى كل الاحوال كسبان

ولو شفت حالة ومحتالة تقول علية دة عايش فى جنة رضوان

والله زمنا دة زمن العجايب

كل ما تعيش فية يابن ادم كل ما تشوف فية حاجات مليانة صعايب

وتلاقى الصبى من كتر غدر الزمان شعر راسة شايب

وتلاقى ضماير البشر سودة غميقة وما تقدر تصدقها ولو لدقيقة

ومهما يعملولك ولو حتى حلفولك ما تقدر تصفالهم

لانهم دايما معاك بيكونوا منافقين والكلام المتزوق

تلاقيهم على طول حابين

خدها نصيحة صريحة مريحة اسمعها

يابن ادم ويا ريت تعمل بيها

لا يوم تامن للزمان ولا تصدقة

وان قدرت غدرة عنك ابعدة لابعد مكان

ومهما يعمل فيك انسى اللى عملة وفكر فى اللى جاى قدام

وعيش حياتك قبل ما يجى وقت مماتك

لانة لو جة وقت مماتك من غير ما تعيش حياتك

راح تتندم وهتتالم لكن ساعتها

لا ندم ولا الم هيفيدك

لانك ببساطة هتكون بقيت فى خبر كان

واللى بيكون فى خبر كان عمرة ما هيرجع مرة تانى للزمان

عمرة ما بيرجع مرة تانى للزمان .

 

 

 

رضوى طارق محمود عكرش (رضوى عكرش)

 

1- بخاف حبه

 

بخاف حبه...وأتوه حبه..وأقول ملناش رجوع تانى

أخاف منه وأغيب عنه وأكون.. حابه انو ينسانى

وحبه حبه يوجعنى ..أقول أنا منه ايه جانى!!؟

ينادينى يرجعنى ...أعود للحب من تانى

 

بعود للحب بمحبه..وشوق ياما ومش حبه

وغصب ان عنى وبكيفى..موافقه أو منيش ..حابه

أقول مش راجعه من تانى ألاقينى ف غرام.. طبه

وأخاف حبه...وأتوه حبه..واقول انا منه ايه جانى؟

ينادينى..يرجعنى..أعود للحب من تانى!

 

بعود للحب ملهوفه ...وبغباوتى اللى معروفه

بتبقى عنيا شفافه...وكل عمايلى مكشوفه

وأدارى يبان..

كلامى يبان..

غرامى يبان..

واعمل قصه من حبه!

وأدوب حبه ..وأتوه حبه..واقول ملناش رجوع تانى

ينادينى ...يرجعنى...أعود للحب من تانى!

 

بقولها لنفسى ميت مره...أنا ف قلبى أكيد حره

وأفتح قلبى وأقول للغرام بره...مخدتش منه غير ذكرى وحاجات مره

وأقول للحب غور من وشى يا أنانى

وأغيب حبه...وأعود حبه...وأعيد الكره من تانى

ينادينى يرجعنى ...أعود للحب من تانى .

 

بخاف انو يعادينى...أنادى عليه يعدينى

ويتقل لما أندهله...ولما انساه ينادينى

بخاف لو لحظه ينسانى ..معيشى اللحظه دى تانى

ألاقى العمر بيسيبنى....وقطر الحب عدانى

أضيع حبه..وأتوه حبه ..وأقول انا منه ايه جانى

ينادينى ..يرجعنى..أعود للحب من تانى!!؟

 

 

2- أنا جبله!!

 

لا أنا عاشق ولا مفارق....ولا صاحى ولا سكران

ولا حنين ولا قاسى.... ولا مبسوط ولا زعلان

ولا م الحر بتضايق...ولا ف البرد أكون سقعان

 

بنام بليل مفكرش وبصحى الصبح مش قلقان

منيش جنب الحيطان ماشى لكن .....غلبان

مفيش حاجه مضيقانى...لكن برضه منيش فرحان

 

أنا جبله..ومبحسش...وتقريبا منيش انسان...!!؟

 

منيش فاكر..ومش ناسى...ولا مخلص..ولا بصباص

ولا ناجح ..ولا فاشل..أنا عايش كده وخلاص

ولما بحب بحب بالراحه ده ان..حبيت

عشان لما انجرح مكرهش كل الناس

 

لا أنا جارح ولا قاسى...ولا تحت الرجول بنداس

ولا على أى شىء باقى..ولا عنديش ايدين تنـباس

ومبفكرش ف الماضى..وعلى قلبى 200 ترباس

 

أنا جبله .. ومبحسش...وفاقد نعمه الاحساس ..!!؟

 

لا أنا عايش على الهامش...ولا ف وسط الطريق بمشى

ولما بروح أنام بليل...بنام دغرى ومبحــلمش

مليش دعوه بكلام الناس...عشان منهم مبسـلمش

وباقى عليا هبقى عليك..هتهجرنى ..أكيد همشى

ولا شاغل دماغى بشىء...أنا أصلا مبزعلش

ومش فاضل كلام يتقال ...وعندى كتير ومتقالش

 

أنا جبله ومبحسش..مبفرحش ومبحـــزنش

 

أنا جبله..أنا طوبه..أنا صخره

لا عايش ف البلد دى سعيد

ولا فكرت ف الهجره

لا فاكر كان ما بينا ايه..ولا هى كمان.. فاكره

أنا واحد ملوش لازمه ...لكن مش هى دى الفكره

أنا عادى ..!!!!؟

 

لا أنا محتاج لحب جديد..ولا مشتاق لحب زمان

ولا خايف من الأيام  ...ولا حسيت فيوم بأمان!!

وبضحك من ورا قلبى..ولا تكسرنى يوم أحزان

 

ولا عاشق..

ولا مفارق ...

ولا صاحى ..

ولا سكران

ولا حنين ولا قاسى..ولا مبسوط ..ولا زعلان

ولا م الحر بضايق.. ولا ف البرد أكون سقعان

 

بنام بليل مفكرش..

وبصحى الصبح مش قلقان

منيش جنب الحيطان ماشى...لكن غلبان

مفيش حاجه مضيقانى...ورغم ده كله مش ..فرحان

 

أنا جبله...ومبحسش..وتقريبا منيش... انسان!!!؟.

 

 

 

ريهام زكريا مصطفى أبوطاقه (صوت القلم)

 

تفتكر

 

تفتكر....

لو كان زمان يرجع

كنا نلاقي حد يسمع

مفتكرش ....

 

تفتكر....

لو رجع العيش بقرش

والتلميذ بطل يغش

ومفيش كمبيوتر ولا نت ودش

ولا سحابة سودا وحرق القش

كانت الضحكة ترجع على كل وش

مفتكرش ....

 

تفتكر....

لو رجع الاحترام

بين سي السيد والمدام

وللمدرس نضرب سلام

ونسمع الكلام

هنبطل نبص لورا ونفكر شويه في قدام

مفتكرش ....

 

تفتكر ....

لو حبينا بعضنا

وزرعنا بإيدينا أكلنا

وفكرنا شويه في ربنا

نقدر نحافظ على أرضنا .... عرضنا

تفتكر ....

 

ساره عبد الفتاح عبد الله (عطر الياسمين)

 

الباث واى

 

لـــمـــا سمعـــــت عــــن البــــــاث واى

اتشـدتـلــــو مـعـــرفــــش ليــــــــــــــــه

حـــاولــــت اســــائـــل هـــــــو ايــــــــه

وميــــن يقــــــــدر يكـلـمـنى عليـــــــــه

اكتشفــــــــت انـــــو مــــن سنــيــــــــن

مـــــــــن حـــوالــــــــــــــــــــى 2002

واحنــــــا كنـــــا عنـــــه غيبيـــــــــــــن

او ممكــــــــــن تقــــــول نـــايميـــــــــن

والله قـــــدر المـــــره دى كنـــا صحيين

تعـــــــــــــرف السبــــــب ميـــــــــــن!!

اكيـــــــد دكتـــرتنــــــا الممتـــــزيـــــــن

يـــــاترى المــــره اللى جايــه على مين

ونتمنى من الله ان نكون نحن الفائـزين

ميــــــن اللى هيوصــل تانى لبـر الامان

ويقــــدر يعمــل مشاريعه بنفسـو كمـان

 

 

 

عماد كمال شحاته جوده (بائع الورد)

 

البندقية شاخت

 

بقى انتى مصر ام الدنيا

اللى الغناوى عليها جبال

بقى دول ولادك يا اماى

دى البندقية شاخت

وما عدشى ليها رجال

بقى طعم الكلام ماسخ

بقى يترمى فى الحال

هريدى ساب الغيط

وساب ولاده كمان

وبقى يغنى للحمير ويغنى للرمان

بقى انتى مصر ام الدنيا

محال وربى محال

عوجولك السانك

وقالولك تتكلمى اذاى

ركبولك سلسله ومشوكى علحبال

بقى انتى مصر ام الدنيا

لع لع

ما عدتش اقولها يا اماى

توهوكى فى بلادك ومشوكى دروب ودروب

ضحكوا عليكى وركبوكى الحمار بالمقلوب

قالولك العالى عشان يوصل لابد يدوب

لابد يغير الجلد ويغير المركوب

عشره على عشرة

تمثيل والباقى رسوب

فين ولادك بقا

نادى اكده

لا تلاقى غير اطفال يحدفوا بالطوب

دى البندقية شاخت وما عدشى ليها رجال

لو قلتى يا ولادى

ما لقيتى فى ابطال

بقى انتى مصر ام الدنيا

اللى الغناوى عليها جبال  

ما عدتش اقولها يا اماى

ما عدتش اقولها يا اماى

 

 

 

فاطمة عيد محمود عبدالحميد (فطومة)

 

القلب البرئ

 

صعب علي الموج الجبان ..

يوصل الشط البرئ

صعب علي القلب اللي خان ..

يسكن القلب البرئ

صعب علي الخطوة اللي تاهت ..

تلقي من تاني طريق

***

الدموع اللي في عنيك  مش دموعي

الشموع اللي في اديك مش شموعي

يا ابتسمتك غيم بتدخل بين ضلوعي

انت زهرة عمري لكن ..

شوكها اقرب من رجوعي !

****

برفضك

من حلم بكره

وابعدك

من اي ذكري

واوعدك

لو تفتكرني ..

اوعدك

مع بعض نبقي !

 

 

 

كامل رجب كامل محمود (كاميلليو)

 

حاكمونى

 

حاكموني بتهمة

اسمها إهانة الرموز

الرموز؟؟ ......... موز إيه؟؟ ..........أه الرموز!!!!

كانوا فين الرموز؟

والناس مش لاقية الغموز

في بلدنا ناس

بتاكل تفاح وموز

وناس مش لاقية الغموز

في بلد الرموز

علوا السجون

ونمروا البيبان

وبوبوا البيان

في كل الصحف واحلفوا على المصحف

انى أنا مسجون

بتهمة إهانة الرموز!!!

 

ماجدة عبدالحارس حسين محمد (ماجدة عبدالحارس)

 

القمـــر يكـــذب

 

كرهتك ياقمر

وكرهت نورك الخادع

في نص الليل

وانت بتحكى وتلاوع

أقول تعبانة م المشاوير

تقول لي خلاص

الليل حيغادر

وانا حيرانة بين أمرين

بتسرق منى ساعاتى وأيامى

وانا سهرانة ليلاتي أقول مواويل

أنا عارفاك ياليل غادر

وظلمة معششة في قلبك

وفكر طوووووويل مالوش آخر

 

فاكر زمان

وأنا فى أول المشوار

فوق السطحة وقدام العتاب

وفي لحظة السامر

لما كنت باسمع لك

وكنت أيامها بتفرش لي

أمل كداب

كفايا عذاب

وخليك معايا صريح

لأني اليوم ماعدتش أصدق الحكايات

 

 

 

محمد بدوي ابراهيم

 

بدون عنوان

 

سكوتي مــش نسيــــــان     برغــم اني انســـان

سكوتي مش ضعـف منى     ولا خوف ولا ندمان

على كلمــــه قولتها

حبتهــــا آه حبتهـــــــــــا     وقـــولــت أقـــولهـــا

وصـراحتها وكان رضها     مـــــش وقتهـــــــــــا

حنين للفات او خوف من الاهات ... مفهمتش ردهـــا

او سبب رفضها المهم وعدتهـــا ... أكـــون أخ لهـــا

مش قــادر انفــذ وعـدى     ولا انســـى حبهــــــا

وده مـــش ضعـــف منى     لكنـــــي عـــرفتـــــها

من قبل معرف اسمها

قولت اخبي عيني أو اقلل من الكـــلام

لقيت صورتهــا قدامي حتى في المنام

قولت اكتبلهــا او حتى اصرحلهــــــــا

خوفت تقول في يوم نسيت وعدي لها

اسكوت واخلى عينى تصارح بالكــلام

ولا اروح واقولها واخالف وعدي لها

سكــوتي مــش نسيـــان     بـــرغم اني انســــان

سكوتي مش ضعف مني     ولا خوف ولا ندمـان

على كلمه قولتها بحبهــــا

 

 

 

محمد عيد على محمد (ابن البادية)

 

تاج العروبة

 

شعر نبطي

 

يا تاج العـروبه يا شهيــد الميـــادين		ياحامى الحمي باكياد الاعادي
نلتى الشهـــادة على يـــد شياطيني		الشرف لــك والعـــار للغــادي
نـــدل خسيس ومــــا لـــه دينـــي		القصـــاص قصنــا ولم ننــادي
يـــأم الشهيــد لا تبكــي لا تعذبينـي		زفي البشري خلها تملا الوادي
شهيــدنا فى جنــه مـــع النبيني		جنب بجنب مع البشيــر العـادي
يحرم على عيني النوم ويندي جبيني		يحرم عليها النوم ويحل السهادي
لنصــون دمــك وأتنبيلها بيميني		رايه العـــز والنصــر لبــلادي
ويصيــر مســلم وجنبـه مسيحيي		إيــد بـــإيد نصنـــع أمجــــادي
وتصير ثورة الحق بريحة رياحيني		لينــا ولشعبنا والجــايين اولادي

 

 

محمد فايز عبد القادر خليل (ابن هذا النهر)

 

حاجات

 

سألت نفسى فى يوم

ايه اللى فيا اتولد

وايه اللى فيا مات

ولقيتنى بأقلب دفاتر

الفرح والازمات

لقيت حاجات كتير اتبنت

وحاجات كتير ماتت

الحب فى قلبى اتبنى

لكن حبيبتى ماتت

الشوق فى صدرى انزرع

لكن زرعته باشت

عيون كتير عــرفتنى

وعيون ما عرفتهــاش

قلنا اكيد حنتقابل

لكن ما قبلتهاش

يا ترى لسه فاكرانى

ولا انــــا اتنسيـــت

زرعى مرعيـــالــــه

ولا مكــــانه بيـــــــت

ليكى وليـــه لــوحديكم

وانا ابقى من برة

موتى نفســك ليــه

من قلبى يا عنيه

هو انتى اللى انا اعرفك

ولا انتى مش هيه

مش شايف فيكى الحنان

مش شايف الحنية

وانا يوم مــا كنـت بأتعب

كنت بأجري وبأروحلك

ألاقيكى ليا الامان

والروح بترتاحلك

هديتى قصرك ليه؟

سبتيه كده فاضى

من يسكنـــه غيرك

يا حــاضرى المــاضى

وكل حتـــه فيــــه

عليكى تنـــدهلــــك

حتجيـبـى دعـــوتهــا

ولا انتى مش جايه

دا ان عودتى ف يوم

انا شارى

قلبك ولو باعنى

وان كنتى يوم سيبتينى

وماله وايه يعنى

انا برضه لسه بحبك

جرجك ليا حأنساه

ف يوم ما تعودى ليا

دا اليوم اللى بأتمناه

حأفتكرلك

حبى اللى حبيته

وحأقول يا قلبى

دى عمرى ووجودى

بس انتى اعمليها

وعودى

 

 

 

محمود إبراهيم مرديشى.(M.Mardishy)

 

أم الدنيا

 

بحبــــك يا بلـــــدى ومهمـــــا عملــت فيا		عشـــان فيـكــى أهلـــى والغـــاليين عليــــا
بحبــــك يا بلــــدى وانــت كـل مــا ليــــــا		وإن كنت شايــف فيكى شئ غــريب عليـــا
فيكى المستخبى ظاهر وخيرك بإدينا حاضـر		يـخـــدوه المستخـبى والبـــاقى لينــا ظـاهر
مش هــم دول يا بلــدى اللى معـاهم هتبقـى		امـــال إزاى يا بلدى من غير نيلك هتسقــى
بصى علينا يا بلـدى هتــلاقى فينــا يا بلــدى		خـــدى بإيديــك وشــدى الحبل طال علينـــا
روحى للنجاح وبصى هتلاقى زويل وابن سينـا		و إن كان فى تانى منهم ألفيـن تــلاته لينـــا
انا لسـة فيـكــة تايه وإن كنت فيكى هــــايم		إزاى يا حبيبتى هصبح فيكى وانا لسه نايم
يا حبيبتى قومى يـــالا وطلى لينـــا طلــــــة		تـــزرع فينـــا الأمـــل وتعودى لينا حـــــرة

 

 

مروه محمود السعيد الفخرانى (مروه الفخرانى)

 

اشكي لمين

 

اشكي لمين حالي؟

ولا حد حتى راضى يسمع موالى

عايزه اصرخ بس صوت الجهل عن صوتي عالي

آجى أتكلم ألاقى اللي واقف قصادى

عشان ماليش دهر ولا حتى سند عالي

وحقي ضايع وسط الخوف وظلم الليالي

وصوتي رافض يطلع إلا للصّح والحق الغالي

رافض يكون شيطان أخرس عن ظلم الأهالي

يبكى قلبي قبل عيني والدمع يا ناس غالى

كل واحد فينا ضايع وضاعت منه الأمالى

وان حد حاول يتكلم يقولوا عليه دا ارهابى

وان سكت صوتنا جوانا يبقى ألف خساره عليكى يا بلادي

ليه بدور على حق نفسي ولا أدور على حق عيالي

وليه بكون ذليل لحد وأشمّت فيا الأعادي

طب ليه مكنش نفسي وابعد الجهل والخضوع عن دماغي

واشكي لمين حالي؟

دا حتى ماحدش راضى يسمع موالى!

عشان هيمر على الواحد زى السراب في الصحارى

دا مفيش غير الرحمن يقدر يحس حالي

ياريت نفوق قبل ما نلاقى كله ضاع في ثواني

 

 

 

مصطفى محمد سيد محمود (مصطفى سيد)

 

لَأنِك حبيبتى

 

لَأنِك حبيبتى

ولإن إنتى أنا وإن أنا إنتى

لأنك نصيبى     لأنك طبيبى     لأنك هوايا     ياكل الهنا

ياكل أمنياتى   يا أحلى حكاياتى   ياأغلى الأمانى   ياكل المنى

*---------*---------*--------*

 

بحبك حب ياعمرى ما قدرش فى يوم أوصفه

ولو وصفته صدقنى فى ناس كتير ما تصـدقه

وأنـــا ميهمنيش النــاس!! اللـى يهمنى إنتى

عـــارفــه ليـــه؟! لأنـــك حبيبتى

*---------*---------*--------*

ده إنتى الوحيدة اللى لو سكتى قلبى برضه بيسمعك

إنتى الوحيــدة، أيــــوه إنتــى اللـــى قلـبى بيعشقك

عـــارفــه ليـــه؟! لأنـــك حبيبتى

*---------*---------*--------*

فداكى القلب وحنينــه   فداكى الروح وحلاوتها

فداكى العمر وسنينه    فداكى الدنيا دى بحالها

عـــارفــه ليـــه؟! لأنـــك حبيبتى

 

 

 

مؤمن محمد عدلى سيد حسانين (عاشق الأبداع)

 

نسمة هوى

 

نسمــــة هـــوى مـعــديـــة ... خــلـتـنـى اغمـــض عنيـــــا

واحــــلم بيهــا واتـــاريـها ... لــحــد تـــانــى مـــش ليـــــا

نسمــة هـــوى ورقتــهــــا ... زى الهــــوى فــى خـفتـهــا

كــل مــا تــرفــرف علـيـــا ... تخـليـنـى اغمـــض عـنـيــــا

واحلــم بيــهـا واتــاريـهــا ... لـحــد تــانــى مــش ليــــــــا

نسمـــة هــوى يــا جمالها ... كـــل امـــا تســــوق دلالـهـا

تخلينى مـا افتكـر غيرهـــا ... واغمــض رمــوش عينيــــا

واحلــم بيهــا واتــاريهــــا ... لــحد تــانــى مــش ليـــــــــا

نسمـــة هــوى وسحـرانى ... شــاغلــة بــالى مجـننــانــى

بشوفهــا بثبت فى مكــانى ... وانـسى جـروحى واحــزانى

وابـــدا امــدلـهــا ايــديــــا ... واغـمــض عنـيــا شــويــــة

واحلــم بيهــا واتــاريهــــا ... لــحد تــانــى مــش ليـــــــــا

نسمـــة هــوى وغـــــدارة ... دى عيونهـا شبكة وصنـارة

وعيونى كـــانت محتــــارة ... وبسـرعة صادتنى بمهــارة

وبعــد شــوية ... غمـضـت عنيــا

وحلمــت بيهــا واتـاريهـــا ... لــحد تــانــى مــش ليــــــــا

نسمـة هـوى وبتعـدى وتفــوت عــلى رمشـى وعلى خـدى

وانــا كنــت بقــول مفيش قــدى لكـن سكوتى ده كان ردى

اول مــا بتهمـس وتعــدى ... بســـــرح وبغمـــض عنيـــا

واحلــم بيهــا واتــاريهــــا ... لــحد تــانــى مــش ليـــــــــا

نسمـــة هـــوى وحيــــاتى ... بعيـــد عنهــــا زى ممـــاتى

دى دوايــــا وشفـــا اهاتى ... دى اجمــــل زكــريـــــــــاتى

اللــى بفتكرها من حياتـــى ... اول مـــا بغمـــض عنيــــــا

بحلــــم بيهــا واتــاريهــــا ... لــحد تــانــى مــش ليـــــــــا

نسمـــة هـــوى ومنــايــــا ... تحــس بقـلبى تحــس هوايـا

وتفضـــل جنبى ومعايـــــا ... فـى وقـــت محتاجهـــا ويـايا

وساعتها عمرى ما ابص ورايا ولا عمرى هاغمض عينيا

واحلــم بيهــا واتــاريهــــا ... لــحد تــانــى مــش ليـــــــــا

نسمــــة هـــوى وانا مالى ... هــى اللى شـــاغله بــــــالى

خــدت عقلى سكنت خيالى ... بـدلتـلى كــــــل احــــــــوالى

حتى ليـلى بقى نهــــــارى ... حتى وانــــا مفتــــح عنيــــا

بحلــــم بيهــا واتــاريهــــا ... لــحد تــانــى مــش ليـــــــــا

نسمـــة هــــوى وخـلاص ... مش هاعشق غيرها يا ناس

وهيكــون ليها الاخــلاص ... هى بــس بتتقــــل عليـــــــــا

ومش هتكون غير ليا .. من غير ما اغمض ولا افتح عنيا

وهـــاحلم بيـها والقيـهـــا ... عمـــرى وحيــــاتى الجــــاية

 

 

 

هاجر سيد أحمد (مهاجرة الأمل)

 

خففت هموم الناس

 

خففت هموم الناس

وأنا مين يخفف جروحى

قلت معلش وداويت وحايلت وطبطبت

ولا حد سأل علىّ يوم

سأصالح نفسى وأيامى يازمانى

قبل ان تدفن الأحلام

وترحل الألوان

ويموت الزمان

 

 

 

فراغ

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

لعلَّ شاعراً يملأ الفراغ

سيد كاسب